Stóra V-12 vél BMW að hætta í framleiðslu
BMW mun stöðva framleiðslu V-12 vélar sinnar í sumar – en þar með lýkur þriggja áratuga ferli.
Þýski bílaframleiðandinn BMW hefur verið þekktur fyrir að búa toppgerðir bíla sinna með öflugum V-12 vélum, sem bæði eru snarpar og hljóðlátar.
Sá sem þetta skrifar var eitt sinn staddur í Munchen á ráðstefnu dagblaðaútgefenda. Samtímis var Oktoberfest að klárast í bænum, kallinn sjálfur varð fimmtugur, og síðast en ekki síst var BMW að frumsýna nýja 7-línu.
Það hafði svo talast til milli mín og söluaðila BMW hér á Íslandi að mín myndi bíða „gott eintak“ af þessum BMW 7-bíl til reynsluaksturs þegar ég kæmi til Munchen, og það stóð heima: Þegar ég bankaði upp á í aðalstöðvum BMW daginn eftir fimmtugsafmælið þá beið mín þessi líka fína „sjöa“ – sjálfskipt með 5.4 lítra M73B54 V12-vél – 322 hestöfl.
Bílnum voru gerð ágæt skil á nokkrum dögum á þessu hausti 1994, en eftirminnilegust er ökuferð að kvöldi til suður frá Munchen til Rosenheim, tæplega 70 km leið eftir hraðbraut, og á þeirri leið var kafli sem hægt var að spretta úr spori.
Og það var svo sannarlega gert; bæði hraðamælir og snúningshraðamælir fóru á stærri og stærri tölu, og loks þegar var slegið af á þessu „flugtaksbruni“ var hraðinn kominn í 195 km/klst – en það fannst ekki meira fyrir honum en svo að maður væri á 90 km á Keflavíkurveginum!
En núna kveður V-12 vélin
Í aðgerð sem engum ætti að koma á óvart á upphafsöld raforku, er BMW að sleppa eyðslusamri V-12 vél sinni.
Tímamótaviðburðurinn gefur til kynna snúning lúxusmerkisins yfir á hreinna – og ákveðið hljóðlátara – tímabil. BMW sagði í síðustu viku að það muni hætta framleiðslu V-12 í sumar og binda enda á rúmlega þriggja áratuga notkun á þessari vél.
Þýski bílaframleiðandinn kynnti V-12 árið 1987. 5,0 lítra M70 vél með náttúrulegu loftflæði og með einfaldan yfirliggjandi knastás, tvo ventla á hverjum strokki og rafræna inngjöf.
Þessi kraftmikla V-12 vél hefur verið á toppi vélaframboðs BMW, í áliti, sléttleika og fágun.
En eftirspurn eftir bensínhákunum hefur dregist saman þar sem neytendur leita eftir kostnaðar- og orkusparandi vélbúnaði. Ríkisstjórnir frá Kanada til Kína hvetja bílaframleiðendur til að koma fram með grænni bílaflota með strangari reglum um losun.
Bílaiðnaðurinn er að bregðast við með því að koma fram með losunarlausar aflrásir.
Í þeim heimi eiga kostir V-12 við fágun og glæsileg afköst ekki lengur við, sagði Ed Kim, forseti AutoPacific.
„Þegar BMW og framleiðendur annarra gæðamerkja leggja áherslu á rafbílaframleiðslu þá gildir það líka um verkfræði- og fjármálahlið framleiðslunnar,“ sagði Kim. „V-12 vélin á sér bæði ríka sögu og arfleifð, en nýjustu aflrásirnar í bestu rafbílunum gera þetta allt að minjagrip úr fyrndinni.“
Hraður vöxtur rafbíla framundan
Búist er við að markaðshlutdeild rafbíla í Bandaríkjunum hækki úr um 2,5 prósentum í dag í 26 prósent árið 2030, samkvæmt spá Guidehouse Insights. Bílaframleiðendur hyggjast koma með meira en 60 nýjar rafhlöðurafknúnar gerðir til Norður-Ameríku fyrir árið 2025.
En þó að sum lúxusvörumerki hafi skuldbundið sig til að verða rafknúin í byrjun næsta áratugar, þá tekur BMW vægari afstöðu.
Um miðjan áratuginn gerir BMW ráð fyrir að afhenda 2 milljónir rafbíla, sem er að minnsta kosti 25 prósent af heildarsölu. Sú tala hækkar í 10 milljónir rafbíla árið 2030, eða að minnsta kosti helmingur af sölu á heimsvísu.
En jafnvel þegar BMW hættir með V-12 mun bílaframleiðandinn bjóða upp á „The Final V12“, takmarkaða röð 12 bíla fyrir viðskiptavini í Bandaríkjunum.
Bílarnir, byggðir á BMW M760i xDrive, eru knúnir af tveggja túrbó 6,6 lítra V-12 vél sem skilar 601 hestafli og 0 til 60 mílna hraða upp á 3,6 sekúndur.
Þeir verða með „V12“ merki, 20 tommu álfelgum með tvöföldum örmum, og annan búnað og tæki til að gera bílana áberandi.
Afhending er áætluð í júlí. Verð byrjar í 200.995 dollurum (liðlega 26 milljónir króna) í Bandaríkjunum, að meðtöldum 995 dollara flutningskostnaði.
(frétt á Automotive News Europe)
