Sony bíll með Playstation á næstunni?
Jæja, Sony er að kannski að fara í bílana. Fyrir fyrirtæki sem hélt því fram að það hefði ekki nokkurn áhuga né vilja til að verða bílaframleiðandi kemur smá á óvart að þeir hafi nýverið kynnt tvær tæknihlaðnar týpur af bílum.
Er þetta ekki svolítið eins og að Grandi færi að opna veitingastaði í togurum sínum?
En bílarnir eru bara nokkuð flottir. Ekkert líkir Playstation leikjatölvu allavega. Þeir kalla fyrirbærið Vision S og síðan S 01 og S 02 – frekar einfalt bara.
Vision S 02 er hinn laglegasti bíll en hæð undir lægsta punkt er rétt um 16 sm. Orðum þetta aðeins öðruvísi. Aðeins styttri og aðeins breiðari en Mercedes GLE og um 50 kg. þyngri en Ford Expedition (hann er þungur).
Búinn tveimur rafmótorum sem gefa um 270 hestöfl, aldrifi og áætlað að hann komist að hámarki upp í 180 km. hraða.
Sony er því ekkert á höttunum eftir verðlaunasæti á Nurburgring – það er tæknin sem talar í þessum bílum. 360° gráðu myndavélin er búin LIDAR tækni sem virkar svipað og laser sem endurkastast af hlutum í kringum hann. Kerfið býður reyndar ekki upp á fulla sjálfvirkni en verið er að undirbúa leyfi fyrir sjálfkeyrandi akstur (level 2+) í Evrópu.
Verkfræðingar Sony segja að það styttist óðum í 100% sjálfvirkan akstur og verið er að gera tilraunir með 5G tengingar en þær eru með afar lítinn biðtíma á flutningi gagna.
Sony hefur sérhæft sig í tæknibúnaði eins og við þekkjum þannig að sjálfkeyrandi bílar eru svo sem ekkert svo langt frá þeirra sviði – en yfirleitt bara í þykjustunni, í leikjum og afþreyingarbúnaði.
Sko, bíllinn er með hljóðgervil sem þú stýrir sjálfur, velur í honum hljóð í akstri og svoleiðis. Hátalarar eru innbygðir í sæti bílsins og eru hluti af þrívíddarhönnuðu hljóðkerfinu. Að sjálfsögðu er hægt að horfa á bíó í bílnum, annað væri nú skrítið bara. Stafræn myndbandstækni sem kölluð er Bravia Core flytur myndir í aflangan skjá fyrir farþega fram í (ekki hugsað fyrir bílstjórann) og sér skjái fyrir aftursætisfarþegana.
Jú, það er hægt að spila Playstation leiki. Og þú þarft ekki að taka tölvuna með þér – bíllinn tengist henni í gegnum netið. Og leikirnir eru svo bara í skýinu.
Sony hefur reyndar ekki ákveðið næstu skref verið er að setja upp deild til að skoða málin. En það lítur hins vegar út fyrir að þeir sem fundu upp vasadiskóið séu að fara í bílaframleiðslu. Af hverju ekki?
Byggt á grein á Autoblog
Umræður um þessa grein