Páfabílar af ýmsum gerðum

Sagan segir að fyrsti páfabíllinn hafi komið til af því að páfi hafi fengið hálfgerða sjóriðu af að vera borinn í burðarstól á öxlum fólks. Hvernig sem það nú var þá er ótrúlegur fjöldi páfabíla til og margir æði undarlegir.

„Popemobile“ eða páfabíll er orðið sem hefur verið notað síðustu áratugina yfir farartæki sem flytur páfa þegar hann er í opinberum erindagjörðum. Fyrsti páfabíllinn er talinn hafa verið Fiat 525 samkvæmt The Washington Post. Var það árið 1929 sem hann rúllaði fyrst með páfa.

Förum ekki of djúpt í söguna að þessu sinni heldur verður stiklað á stóru.

Til að sem flestir sjái

Páfabíllinn er hannaður með það í huga að fólk sjái páfann sem best en hann er iðulega umkringdur fólki. Þess vegna eru bílarnir flestir háir að aftan og minna jafnvel á pallbíl með ísskáp aftan á pallinum.

Hönnun sumra bílanna miðast við að páfi geti staðið uppréttur í þeim en í öðrum situr hann hátt.

Númeraplötur páfabílanna bera stafina SCV og þar á eftir kemur tölustafur. SCV er skammstöfun fyrir Status Civitatis Vaticanae.

Eftir morðtilræði árið 1981 (Jóhannes Páll páfi II. var skotmarkið) hefur skothelt gler verið „staðalbúnaður“ páfabíla, ef svo má að orði komast.

Jóhannes Páll páfi II. fór árið 2002 fram á að fjölmiðlar hættu að kalla ökutækið „Popemobile“ því það væri ósæmilegt og í raun vanvirðing. Það heiti hefur þó verið notað síðan á áttunda áratug síðustu aldar og er enn notað.

Frans páfi hefur kallað páfabílinn sardínudós úr gleri en fáir páfar hafa haft eins margar tegundir bíla til umráða og Frans. Ætli hann sé bílaáhugapáfi?

Árið 2019 einkenndist af afskaplega mörgum tegundum páfabíla. Dacia Duster og Kia Soul voru á meðal bílanna.

Bílaframleiðendur hafa margir hverjir smíðað bíl fyrir páfa þegar hann kemur í opinbera heimsókn til landa sem framleiða bíla. Til dæmis má nefna Toyotu í Japansheimsókn og Dacia í Rúmeníuheimsókn.

Þegar páfi fór til Tælands árið 2019 ferðaðist hann um á pallbíl frá Nissan sem smíðaður var á svæðinu. Þar var líka smíðaður þessi fíni páfagolfbíll sem hlýtur að teljast frekar óvanalegt.

Þessu tengt:

Vetnisdrifinn Toyota Mirai „páfabíll“ smíðaður fyrir Frans páfa

?Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.