Óheyrilega óheppin hjón í Worcester
13 bílar ónýtir á 15 árum
Hjón sem búa í Worcester á Englandi hafa verið með eindæmum óheppin hvað bíla snertir, eða öllu heldur búsetu og bíla. Orðið „óheppni“ nær tæplega yfir það sem um ræðir en einhvern veginn er ekið fáránlega oft á bíla þeirra framan við heimilið.
Ekki nóg með það heldur virðast ýmsir ribbaldar sem leið eiga um hverfið hafa sérlega gaman af því að ganga upp að bílunum þeirra, þar sem þeir standa fyrir framan parhúsið við Tolladine Road, og brjóta af þeim spegla og annað sem hægt er að skemma. Allt þetta sjá þau á upptökum úr öryggismyndavélum en fátt er hægt að gera.
Tveir bílar á tveimur dögum
Þau virka indæl og ósköp venjuleg hjón á miðjum aldri. Það er að segja ef fimmtíu ár er miðja vegu á milli fæðingar og hundrað ára, eins og það var síðast þegar maður athugaði. Undirrituð leit aðeins á Facebook-síður þeirra til að athuga hvort þetta væri eitthvað út hött eða tilbúningur og nei, svo er aldeilis ekki að sjá.
Þau Maria Roberts og Steve Passey fluttu í parhúsið árið 2001. Fjögur ár liðu þar til „bílaslátranirnar“ hófust. Árið 2005 varð harður árekstur fyrir framan húsið og þá eyðilagðist Roverinn þeirra. Árið 2019, þegar fréttin var skrifuð sem undirrituð vísar í, voru ónýtu bílarnir orðnir 12 talsins. Og síðan hefur einn bæst við. Þetta er svo gott sem einn ónýtur bíll á ári.
Þá er aðeins átt við þegar bílarnir skemmast það mikið að þeir teljast ónýtir. Eins og í eitt skiptið þá eyðilögðust báðir bílarnir á tveimur dögum. Minniháttarklessuverk virðast ekki teljast með. Eins og þau skipti þegar ekið er á báða bílana þeirra og þeir beyglast jú en ekki alvarlega.
Þetta má til dæmis sjá á upptökum úr öryggismyndavélum þeirra og þessu hefur Maria deilt á Facebook en ég kann nú ekki við að falast eftir þeim upptökum.
Eins og svarthol
Nú hljóta flestir að spyrja hvernig í veröldinni standi nú á þessum ósköpum og hvort fólkið geti ekki lagt annars staðar. Þegar þessi tiltekna gata er skoðuð á korti (ég notaði Google Maps og Street View) er nokkuð ljóst að fjölmargir neyðast til að leggja við hlið götunnar þar sem engin bílastæði eru við sum húsin. Svona eins við Skólavörðustíg (efsta hlutann).
Þannig að ekki er hægt að leggja annars staðar svo vel sé. En þá vaknar spurningin hvort aðrir íbúar sem þurfa að leggja við götuna búi við sömu lendi ekki í því sama. Það er nefnilega ekki svo. Auk þess eru þau einu íbúarnir á þessum vegarkafla sem ekki eiga stæði upp við hús þó þaðm eigi ekki við um alla Tolladine Road sem er býsna löng að sjá á korti.
Hámarkshraðinn er 30 en rétt áður en komið er að húsi hjónanna virðist gatan breikka örlítið og þar hafa margir freistast til að gefa í. Svo þrengist gatan aftur og sumir enda á bílum þeirra hjóna og enn aðrir „strjúkast“ við þá og stinga af.
Þeir sem einna erfiðast eiga með að stinga af eru þessir á bílunum sem hafa komið fljúgandi (eftir að hafa klesst bíl) inn í garðinn þeirra og má í raun þakka fyrir að húsið standi ekki nær götunni en raun ber vitni.
Gætum gefið þeim hraðahindrun
Virðist fólkið hafa ítrekað óskað eftir hraðamyndavél, hraðahindunum eða hringtorgi en ekkert bólar á neinu slíku. Við eigum nú nóg af hraðahindrunum. Gætum við ekki gefið þeim nokkrar?
Fleiri mannlegar bílasögur:
Hversu óheppinn… eða heppinn?
Fann falin skilaboð í notuðum bíl
Gleymdi hvar hann lagði bílnum: Svo liðu 20 ár
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
