Maður nokkur frá Cornwall, Tyler að nafni, áður Ben Granger, heldur því fram að hann sé launsonur Johns DeLorean (f.1925, d. 2005). DeLorean nafnið kannast flestir lesendur eflaust við en John DeLorean var maðurinn sem sérkennilega bifreiðin DMC DeLorean er kennd við.
Bíllinn sá er einkum og sér í lagi frægur fyrir að hafa farið aftur til framtíðar í myndinni Aftur til framtíðar (e. Back to the Future). Raunar urðu myndirnar þrjár talsins en það skiptir ekki máli í þessu samhengi.
Bíllinn sjálfur, launsonurinn og sá bílablaðamaður er þessi orð ritar koma öll úr fortíðinni, nánar til tekið frá því herrans ári 1981. Hafa árin farið misblíðum höndum um okkur og í sannleika sagt sýnist mér hrjúfar krumlur áranna ekki hafa komið nálægt ryðfríu stáli bílsins en hvað getur maður svo sem sagt um tímavélar. Eldast þær vel eða illa?
Merkileg tilviljun, þetta með árið 1981, en ef til vill ekkert til að hafa sérlega hátt um.
ÞríhjóLorean á markað innan árs?
Maðurinn sem um ræðir og segist vera sonur Johns DeLorean, mun samkvæmt alnetinu, hafa breytt nafni sínu úr Ben Granger í Ty [Tyler] DeLorean fyrir tæpu ári síðan en eitt og annað bendir til þess að maðurinn sá eigi í eilítilli rimmu við eigið sjálf.
Eftir sem áður hafa nokkur blöð birt við hann viðtöl að undanförnu þar sem fjallað er um bifreið sem Ty DeLorean kveðst vera að smíða.
Bifreiðin er í raun hið fallvalta (allavega valta) þriggja hjóla fyrirbæri Reliant Robin (eða Reliant Rialto) með „máva“vængjahurðunum (gull-wing doors ) sem kenndar hafa verið við DeLorean.
Nú er staðan sú að DeLorean Motor Company hefur höfðað mál á hendur Ty, meðal annars fyrir að nota vörumerkið DeLorean. Hins vegar virðist fátt ef nokkuð hafa heyrst úr hinum óáreiðanlegu búðum Reliant, en stráksi notar bíla Reliant sem grunn bílsins sem hann segir að komi á markað innan árs: DeLorean DMC 1.21.
Húmor í karli
Bíllinn, sem launsonurinn segir að sé alfarið byggður á upprunalegri framleiðsluáætlun frá árinu 1981, mun fást bæði sem alrafmagnaður bíll og tvinnbíll.
„DeLorean DMC 1.21 er nýja rafmagnstímavélin sem getur farið með okkur til framtíðar. [..] Eins og staðan er í dag er þetta eina tímavélin sem virkar. Fjárfestu í einni slíkri í gær!“
Já, það er margt skondið á síðunni sem tileinkuð er bílnum sem hægt er að panta strax í dag til að missa ekki af herlegheitunum:
Sendum hvert sem er í heiminum.
Svifbretti fylgir hverri pöntun
Pantanir hrúgast inn
Gríngjörningur eða alvara?
Leikarinn og bíladellumaðurinn sem fór með aðalhlutverkið í myndunum Aftur til fortíðar, Mikki refur (Michael J .Fox) eins og ég kalla hann, var þrítugur þegar hann greindist með Parkinsonveiki.
Ty DeLorean segir á vefsíðu sinni að hluti ágóðans af sölu DeLorean DMC 1.21 fari í rannsóknarsjóð Michael J. Fox.
Michael J. Fox Foundation vinnur markvisst að rannsóknum á Parkinsonveiki.
Að þeim þætti undanskildum virðist allt í kringum „launsoninn“ og þríhjólabílinn vera grín. Á TikTok síðu Ty DeLorean er fjöldi myndbanda af honum sjálfum baða sig í heitum potti sem er, tjah…hvernig á ég að orða það, jú í Reliant 1.21 bíl. Bíllinn er heitur pottur. Þetta er virkilega mikið spes.
Sjálfur hefur Ty sagt að hægt sé að fá bílinn „með tilsniðnum heitum potti“ og að bíllinn geti flogið.
Að sjá manninn, í freyðibaði í „bíl“ leika sér með leikfangaútgáfu af DeLorean, bendir, eins og allt annað, til að ekki sé allt með felldu. Vonandi er þetta hluti af útskriftarverkefni í gjörningalist eða „hvernig-á-að-gabba-fólk“.
Á vefsíðunni er að finna skjáskot af ýmsum greinum sem skrifaðar hafa verið um Ty og bílinn. Kannski birtist skjáskot af þessari umfjöllun minni á síðunni hans Ty. Hver veit.
Engin þörf á DNA prófi
Í allri hringavitleysunni hefur nánast gleymst að spyrja út í faðernismálið. Blaðamaður Cornwall Live spurði Ty út í þau mál og svaraði hann
„Ég þarf að passa vel upp á hvað ég segi um þetta til að hlífa fólki sem stendur mér nær. En stutta sagan er sú að þegar hann [John DeLorean] var á Norður-Írlandi hitti mamma hann örstutt og þá var ég getinn. Mamma ákvað að enginn þyrfti að vita af þessu. Ég ræð hvort og hvernig ég nota nafnið. Þetta er nafnið mitt, nafnið sem í vegabréfinu mínu. Þannig að fyrir dómi verður þetta DMC gegn DeLorean og það er nú áhugavert,“ sagði Ty í viðtalinu.
Sagði hann að starfslið Back To The Future (Back To The Future crew) hafi boðist til að greiða fyrir DNA próf en það er eitthvað sem Ty telur mega bíða fram yfir réttarhöldin.
Þannig var nú það! Hægt væri að skrifa mun meira um þetta kúnstuga mál en ætli undirrituð láti þetta ekki gott heita sem framlag til furðugjörnings Ben Granger eða Tyler DeLorean.
Umræður um þessa grein