Það gerist kannski ekki oft að íbúar hverfis beini reiði sinni gegn aðdáendum tiltekinnar kvikmyndar. Myndar sem kom út fyrir 21 ári. En þannig stendur á núna. Hverfið er í Angelino Heights (einnig ritað Angeleno Hights) og myndin er The Fast and the Furious. En það er fleira sem truflar.
Hverfið í Angelino Hights í Los Angeles er tiltölulega rólegt. Alveg þar til aðdáendur kvikmyndarinnar mæta á staðinn á bílunum sínum og ímynda sér að þeir séu áhættuökumenn í tökum á einhverju atriði myndarinnar en myndin var að hluta til tekin upp í hverfinu. Og þær ímynduðu tökur fara oftar en ekki fram eftir að kvölda tekur. Já, meira að segja eftir að flestir íbúar hverfisins ganga til hvílu.
Það má vel sjá á götunni, staurum, skiltum og kyrrstæðum bílum hvernig ökumenn hafa staðið sig og er sannarlega allur gangur á því.
Nei, ekki meira!
Eins og kom fram hér að ofan þá voru atriði í fyrstu myndinni (F&F myndirnar eru nú orðnar 9 talsins) tekin upp í hverfinu, enda átti ein aðalpersónan (sem Vin Diesel lék) heima í Angelino Heights. Það var bara byrjunin. Það er að segja byrjunin á F&F tengingunni því myndirnar eru jú margar og nú er verið að taka upp þá tíundu; Fast X.
Hverfið hefur lengi þótt prýðilegt sem sögusvið í kvikmyndum og myndböndum. Má til dæmis nefna að sama hús og persóna Vins Diesel bjó í, birtist í tónlistarmyndbandi Michaels Jackson fyrir lagið Thriller (af samnefndri plötu) og í þáttum er nefnast Charmed.
Nú hafa íbúar fengið nóg og hafa þeir sent formlegt erindi til borgarstjórnar Los Angeles.
Hefur það ekki eingöngu með þriggja tommu púst og ímyndaða áhættubílstjóra í kvikmyndatökum að gera heldur einnig þá staðreynd að verið er að taka tíundu F&F myndina upp í hverfinu með tilheyrandi átroðningi ferðafólks og áhangenda sem og hættunnar sem skapast af öllu þessu því þetta er jú bara venjulegt hverfi. Með gangandi vegfarendum, börnum og því sem tilheyrir svona almennt.
Þá er lyktin af brenndum hjólbörðum í loftinu og skranshljóðin eftir en það er eitthvað sem er kannski fínt á driftkeppni í eitt og eitt skipti en ekki fyrir utan heimilið; innan um fólkið manns og bílana. Sama hversu hressandi manni kann að finnast þetta úti á akstursíþróttasvæði eða á sýningu.
Horft inn í byssuhlaup
Íbúar hafa sumir hverjir rætt við fjölmiðla þar sem þeir segja frá reynslu sinni af því að vera skyndilega orðnir aukaleikarar í ímynduðum áhættuatriðum. Einn sagðist hafa rætt við bílstjóra sem ók eins og vitleysingur um hverfið. Íbúinn uppskar hvorki klapp né bros heldur var byssu beint að honum. Sem er jú ákveðinn en óhefðbundinn tjáningarmáti.
Annar fékk svar á táknrænan hátt en það var í formi brennandi ruslatunna. Já, það var kveikt í ruslatunnunum hans sem stóðu auðvitað upp við húsið. Enn aðrir hafa horft upp á menn aka utan í bíla í hverfinu og svo séð bílstjórana aka á brott í snatri.
Tökur á þeirri tíundu (F&F, jú, það er erfitt að telja þetta) hófust í gær og var það á dagskrá hjá íbúum að mótmæla því að hverfið breytist í akstursíþróttasvæði auk þess sem vakin er athygli á þeim vaxandi vanda sem óskipulögð götuspyrna er í Los Angeles. Segir hópurinn sem skipuleggur mótmælin að 178 hafi látið lífið í slíkum kappakstri en það kemur reyndar ekki fram á hve löngu tímabili. Enda er það ekki kjarni málsins.
Universal Studios (framleiðandi myndanna óteljandi) hefur ekki svarað íbúum sem hafa kvartað og sent erindi en íbúar óttast framhaldið. Þ.e. hvað kann að gerast eftir að tökum lýkur. Það er að segja þessum tökum. Hvað ef F&F myndirnar verða 20 talsins o.s.frv.
Hér er frétt um málið og þar má sjá mikil för eftir kleinuhringjabakara götunnar og fleira umdeilt.
Annað sem tengist akstri, illum íbúum og almennum „leiðindum“:
Hefði átt að færa bílinn
Varð fyrir eigin bíl – þrisvar
Óheyrilega óheppin hjón í Worcester
Hér „hanga“ Jay Leno og Jerry Seinfeld: Í óþökk margra
?Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein