H5N1? Nei, það er fuglaflensa. Ó! Afsakið. Ætli það sé þá ekki bZ4X? Jú, en þá er stóra spurningin hvort það sé Toyota bZ4X XLE FWD eða bZ4X AWD XMODE. Settist einhver á „takkabrettið“ eða hvaða flækja er þetta eiginlega? Er búið að útrýma nöfnum eins og Fiat Panda?
Nei, það er ekki svo slæmt að Pandan sé útdauð en sannarlega er hún í útrýmingarhættu. En þessi bókstafahali sem er á eftir tegundarheiti margra annars ágætra ökutækja er bara kominn út í tóma vitleysu. Þetta getur ekki verið auðvelt fyrir lesblinda eða bara nokkurn einasta mann. Tökum nokkur dæmi.
Við byrjuðum á Toyota bZ4X XLE FWD og Toyota bZ4X AWD XMODE. Þetta er ekki einhver tilviljanakennd bók- og tölustafaruna. Ekki frekar en í öðrum tilfellum. Rýnum aðeins í stafahalann:
bZ: beyond Zero
X vísar til Crossover en Toyota útskýrði ekki hvað 4 stendur fyrir. Kannski 4 dekk? 4 sæti? Neinei, sennilega er það möguleikinn á fjórhjóladrifinu, sbr. RAV4. Þó að bílarnir fáist líka framdrifnir.
XLE er fyrir Executive Luxury Edition og FWD fyrir front-wheel drive.
Toyota vill væntanlega að nafnið segi frá öllu þessu en í raun og veru virkar þetta álíka vel á hinn almenna kaupanda og VIN-númer bílsins (Vehicle Identification Number).
Þannig að ef maður vildi þylja þetta allt upp kæmi út: Toyota beyond Zero Four Crossover Executive Luxury Edition front-wheel drive.
Þá væru allir farnir því enginn nennir að hlusta á svona romsu. Held ég.
Þá er nú betra að eiga Toyota AYGO.
Fleira svona:
MG5 EV Long Range
Honda HR-V e:HEV en HEV stendur fyrir (Hybrid Electric Vehicle).
Úr stafasúpu í orðasúpu
Land Rover Range Rover Sport HSE Autobiography Dynamic P400e
Úff… Þetta er nú ekki skemmtilegt. Ekki frekar en þetta:
Land Rover Range Rover Evoque 2.0 TD4 E-Capability 4×4 HSE Dynamic
Já, voða fínir bílar – ekki spurning sko! En þvílíkt og annað eins rjómatertufrauð með jerúsalem-ætiþistlum, jarðskokkakvoðu og eldpiparmarmelaði.
Eina með öllu og Fiat Uno. Málið dautt.
Porsche Panamera Turbo S E-Hybrid Sport Turismo
BMW Individual M760Li xDrive Model V12 Excellence THE NEXT 100 YEARS
Ekki láta þessar fara framhjá þér:
Sum nöfn eru verri en önnur
Grimmd, þokki og styrkur tegundaheita
Nýir bílar Volvo munu fá nöfn í stað númera
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein