Mercedes-Benz EQB með 7 sæta valkosti, bætist í EQ-rafbílaflokkinn og verður frumsýndur á næsta ári
Byggður á GLB og er fjórhjóladrifinn: Meðal keppinauta eru bílar frá Volvo, Audi og Genesis
Mercedes-Benz hefur kynnt helstu upplýsingar um EQB, rafknúinn sportjeppa með möguleika á sjö sætum. Bíllinn verður frumsýndur í Evrópu snemma á næsta ári.
EQB – í raun rafknúin útgafa af GLB með brunavél – sem var frumsýndur á bílasýningunni í Shanghai í apríl. Hann er hluti af EQ rafbílalínunni frá Mercedes en aðrir bílar hennar eru EQA crossover, EQS eðalvagninn (sem kom á markað á þessu ári), stóri fólksbíllinn EQE og svo EQC sem er bíll í millistærðarflokki.
Mercedes hefur ekki gefið upp verð fyrir EQB. Grunnverð GLB er um 40.000 evrur í Þýskalandi, en AMG gerð bílsins, sem er fjórhjóladrifin, er á 57.000 evrur.
Grunngerð EQB er með fimm sætum, en þriða sætaröðin er valkostur. Hún er ætluð minni farþegum (allt að 165 cm), segir Mercedes. Önnur sætaröðin getur einnig færst fram um allt að 140 mm til að skapa meira rými fyrir farþega í þriðju sætaröðinni.
Mercedes segir að sjö sæta valkosturinn muni gefa EQB forskot meðal sportjeppanna í þessum stærðarflokki. GLB hefur einnig valfrjálsa þriðju sætaröð.
Jafnvel þótt flestir GLB kaupendur noti sjaldan þriðju röðina „eru sjö sæti eitthvað mjög sérstakt í þessum flokki,“ sagði Marius Philipp, vörustjóri minni bíla hjá Mercedes, í fréttatilkynningu á mánudag.
Volvo, Audi og Genesis eru keppinautarnir
Meðal hugsanlegra keppinauta má nefna Volvo XC40 Recharge, Audi Q4 e-tron, Genesis GV60 og jafnvel Volkswagen ID4. BMW ætlar að setja iX1, útgáfu af X1, á markað á næsta ári, samkvæmt fréttum.
EQB er með annað útlit að framan og aftan en GLB. Án útblástursrörs er afturendinn mjórri og inniheldur númeraplötuna, sem er rétt fyrir neðan afturrúðuna á GLB. EQB-bíllinn er með ljósastiku í fullri breidd frekar en aðskilin afturljós.
Framendinn er loftaflfræðilegri, aðalljós og grill eru samtengd í eina einingu og neðri loftinntökin eru stærri en á GLB. Felgurnar eru líka með loftaflfræðilegri hönnun.
Tvær gerðir – báðar með fjórhjóladrifi
Í fyrstu verður boðið upp á tvær gerðir, báðar með fjórhjóladrifi: EQB 300 4MATIC, sem skilar 225 hö (168 kílóvöttum) og 390 Nm; og EQB 350 4MATIC, með 288 hö (215 kW) og 520 Nm. Aðaldrifmótorinn er að framan, með rafdrifnum öxlum sem knýja afturhjólin þegar þörf krefur.
EQB 300 fer úr 0-100 km/klst á 8 sekúndum, en EQB 350 tekur 6,2 sekúndur að ná 100 km/klst. Mercedes segir að drægni samkvæmt WLTP-ferli sé 419 km fyrir báðar gerðir.
Báðir eru með 66,5 kílóvattstunda rafhlöðu, en með gerðum með lengri drægni fyrirhugaðar. Hleðslutími frá 10 prósent til 80 prósent á 100 kW stöð er 32 mínútur, segir Mercedes. Framtíðarframboðið mun samanstanda af fjórum framhjóladrifnum gerðum.
Það eru fjórar orkuendurnýtingarstillingar sem hægt er að stjórna með flipum á stýrinu. Að auki gefur innbyggður „akstursaðstoð“ sem kallast ECO Assist, ráð um hvernig auka megi drægni.
Mercedes býður kaupendum upp á ókeypis hleðsluár á stöðvum í Mercedes Me netinu, sem nær yfir 250.000 almenningsstöðvar í Evrópu.
EQB er fyrsti rafbíllinn sem smíðaður er í verksmiðju Mercedes í Kecskemet í Ungverjalandi, eftir fjárfestingu upp á meira en 100 milljónir evra þar. Bíllinn verður einnig smíðaður í Beijing fyrir kínverska markaðinn.
(Frétt á Automotive News Europe – myndir frá Mercedes)
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein