Yas Marina brautin í Abu Dhabi er ekki ný í Formúlu 1 en hún henni hefur verið breytt töluvert. Svo miklar eru breytingarnar að ökumenn sem oft hafa ekið á Yas Marina segja að hún sé eins og allt önnur braut.

Svona lítur brautin út. Mynd/Mercedes

„Verulegar breytingar hafa verið gerðar á Yas Marina, þannig að þetta verður eins og að aka eftir allt annarri braut,“ sagði Sebastian Vettel, sem ekur fyrir Aston Martin liðið í Formúlu 1.

Öllu einfaldari mynd af brautinni.

Vettel sagði sömuleiðis að búast mætti við að ökumenn næðu mun betri tímum á hringnum og að það verði „áhugavert að sjá hvernig það kemur til með að hafa áhrif á dekkin og ökulag, sem og hvaða breytingar við þurfum að gera á uppsetningu bílanna.“

Sebastian Vettel ætti að vita nokkuð vel um hvað hann er að tala en sjálfur hefur hann unnið Abu Dhabi kappaksturinn þrisvar sinnum.

Akstur í ljósaskiptum og myrkri á „nýrri“ braut

Tímatakan í dag og sjálf keppnin á sunnudag fara fram að mestum hluta í myrkri en hefjast í ljósaskiptunum og þess vegna prófuðu ökumenn brautina við sömu birtuskilyrði í gær.

Í ljósaskiptunum í gær á Yas Marina brautinni í Abu Dhabi. Getty Images / Red Bull Content Pool

Keppni að næturlagi er engin nýjung í Formúlu 1 en fyrsta keppnin að nóttu til var haldin í Singapúr árið 2008 ​​og í ár voru næturkeppnirnar á Formúlu 1 dagatalinu fjórar talsins: Bahrain, Katar, Jeddah í Sádi-Arabíu og Abu Dhabi. Þó er keppnin í Abu Dhabi ekki algjör næturkeppni þar sem hún hefst í ljósaskiptunum, sem fyrr segir.

Nokkrar staðreyndir um Yas Marina brautina

  • Brautin er hönnuð af Þjóðverjanum Hermann Tilke og var hún tekin í notkun árið 2009.
  • Önnur brautin sem gerð var í Mið-Austurlöndum. Sú fyrsta er brautin í Bahrain.
  • Síðasta braut tímabilsins í Formúlu 1 frá 2009 að þremur árum undanskildum.
  • 60.000 áhorfendur komast fyrir á áhorfendasvæðinu en talið er að yfir 125.000 manns leggi leið sína á svæðið yfir helgina til að fylgjast með.
  • Sá ökumaður sem oftast hefur unnið keppnina á Yas Marina er Lewis Hamilton sem hefur borið sigur úr býtum fimm sinnum.
  • Beygjurnar eru færri á endurgerðri brautinni en þeim fækkaði um fimm.
  • Hringirnir sem eknir eru í keppninni eru 58 talsins, hver þeirra 5.281 km á lengd og heildarkílómetrafjöldi í keppni nemur 306.183 km.
  • Lengsti beini kaflinn er 1.173 metrar og mun vera lengsti „gefa-í-botn“ kaflinn af þeim brautum sem keppt er á, að því er fram kemur hér.
  • Samningur hefur verið endurnýjaður þannig að keppt verður á brautinni til og með 2030.

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.

Sett inn
11/12/2021
í flokknum:
Mótorsport

Fleiri fréttir úr flokknum:

Mótorsport

skoða allt

Skráðu þig á póstlistann okkar
Fáðu nýjustu greinarnar í pósthólfið þitt

Thank you! Your submission has been received!
Oops! Something went wrong while submitting the form.